Proyekto di Zakito District Cooling

A establesé un koperashon di kompanianan nashonal i internashonal a pa asina huntu desaroyá e sistema di Zakito District Cooling. E konsorsio aki ta konsistí di Curaçaose Wegenbouw Maatschappij (e divishon di Kòrsou di Janssen de Jong Group, Hulanda), Ecopower International (Kòrsou), Deerns (Hulanda), Civil Engineering Caribbean (Kòrsou) i DEVCCO (Suesia). E kompanianan aki ta konosí pa nan eksperensia den desaroyá ‘district cooling’ (produkshon sentralisá di friu) riba un eskala grandi, energia, infrastruktura i proyektonan di ‘deep seawater pipeline’ (sistema di pipa di awa di fondo di laman), rònt mundu.

E sistema di Zakito District Cooling por konektá Curaçao Caribbean Resort (antes Hilton), Curacao Marriott Beach Resort, WTCC, Clarion hotel, Piscadera Residence, Corendon Beach Resort, Curaçao Medical Center, Sentro Médiko Otrabanda, Analytisch Diagnostisch Centrum (ADC) i Renaissance Hotel riba e ret aki, loke lo proveé e establesimentunan aki ku un alternativa sostenibel, konfiabel i mas kumbiniente pa fria e edifisionan. E meta di e proyekto aki ta pa konektá edifisionan sentralisá entre Renaissance i Curaçao Caribbean Resort, inkluso e hospital nobo (CMC) i posiblemente e sentro komersial Sambil (e asina yamá área Zakito) ku mester wòrdu friá. Den futuro e proyekto aki por proveé su servisionan tambe na aeropuerto i na e sentro di dato. Mas ku 75% di e kapasidat ya ta komprometí ku e proyekto. Teniendo na kuenta e aprobashon di pèrmitnan i e finalisashon finansiero, konstrukshon di e sistema di Zakito District Cooling ta planiá pa kuminsá kunisamentu di 2020. E espektativa ta pa e konstrukshon tuma aproksimadamente 18 pa 24 luna.

E proyekto lo generá un kantidat supstansial di trabou durante ehekushon:

  • Aproksimadamente 100 persona durante di e konstrukshon.
  • 5-10 persona durante operashon.
  • E sistema di Zakito District Cooling lo hasi posibel pa desaroyá e industria di ‘deep seawater’ (awa di fondo di laman), loke ta spera di proveé aproksimadamente 500 pa 600 kupo di trabou riba nivel medio i haltu ku un kontribushon ekonómiko kalkulá na $100 mion pa Kòrsou.

‘District cooling’ ta adekuá pa desaroyonan ku tin un demanda haltu pa aire kondishoná. Ta generá ‘district cooling’ di forma sentralisá i mayoria bia e ta basá riba friamentu natural – for di awa di fondo di laman òf lagonan, awanan supteraneo, riunan, laman òf kombershon di kalor residual/bio energia – den friamentu pa medio di teknologia di apsorpshon. Ademas ta posibel pa inkluí friadónan konvenshonal, pòmp di kalor i almasenahe. Usualmente ta distribuí e awa friu pa e usuario, via di un sistema di distribushon di sirkuito será (‘closed loop’) bou di tera. Den kada edifisio e awa friu distribuí ta pasa dor di un stashon di transferensia di energia (‘energy transfer station’ – ETS). E ETS aki ta un ‘interface’ entre e sistema di distribushon i e usuario su sistema konvenshonal interno, proveyendo e edifisio ku e mesun aire friu di kustumber.

E ‘district cooling’ ku ta produsí di forma sentralisá por yega na 10 bia mas efisiensia den suso di energia ku e ekiponan lokal ku ta funshoná riba elektrisidat.

Algun dato general pa loke ta trata e proyekto aki ta:

  1. Lo e redusí uso di energia pa friamentu ku mas ku 95%, loke lo resultá den:
    • Redukshon di importashon di petrolio (40,000bbl) i asina tambe gastunan na moneda estranhero (ca. 3.6 MANG).
    • Seawater District Cooling (SWDC), esta ‘district cooling’ pa medio di awa di laman, lo spar (Ca. 3-4 MANG) tambe (si kompará esaki ku e tarifanan averahe di elektrisidat) riba e asina yamá supsidio krusá dor di otro usarionan pa klientenan ku tin e tarifa di eksportashon.
    • Redukshon di emishon di GHG (CO2 pa produci elektrisidat CHFs (e gas den airco).
    • SWDC lo proveé te ku 70% di e energia total kompará ku e suministro konvenshonal di elektrisidat ku aworakí friadónan ta gasta.
  2. Ademas, SWDC ta habri e posibilidatnan pa Deep Seawater Industry (Industria di Awa di Fondo di Laman) pa investigashon, desaroyo i eksplotashon di akuakultura, agrikultura i otro aktividatnan ku lo tin efekto indirekto.

Inisiá pa Zakito District Cooling, a establesé e Curacao Deep Seawater Industry Platform (Plataforma pa Industria di Awa di Fondo di Laman Kòrsou) ku ta konsistí di organisashonnan públiko i privá (inkluyendo universidatnan). E meta di e plataforma aki ta pa analisá i determiná posibilidatnan i balor di awa di fondo di laman pa Kòrsou i implementá un strategia pa e industria di awa di fondo di laman ku eventualmente lo surgi.

Por usa e awa residual di e sistema di Zakito komo un kontribushon pa e Industria di Awa di Fondo di Laman. Proyektonan ku por desaroyá den futuro tin di aber ku Agrikultura (invernadero – ‘greenhouse’ – ku por produsí un gran parti di bèrdura nesesario pa Kòrsou), Akuakultura (kultivo di kabaron, almasenahe di kref, ets.), kultivo di mikro alga pa industria farmaseutiko, desalinashon di awa di fondo di laman i fasilidatnan di investigashon i desaroyo manera Ocean Thermal Energy conversion (OTEC – Kombershon di Energia Térmiko Oseániko).

* E informashon ariba menshoná ta proveé pa Ecopower International.

Duna bo komentario

Sign up for WhatsApp updates from Un Kòrsou Próspero