Windsurfing Curaçao

Windsurfing Curaçao tin 13 aña kaba ta duna lès di wensùrf riba nos isla. Ademas di esaki, nan ta hür tablanan di wensùrf ku klientenan. Seis aña pasá Windsurfing Curaçao a amplia i a bini aserka SUP Curaçao (SUP – Stand Up Paddleboarding), ku ta brinda rekorida riba awa (‘tour’)  den ‘paddleboard’. For di aña pasá e kompania ta ofresé tambe lès di ‘kiteboard’.

Den 2019 Windsurfing Curaçao a ranka sali ku un proyekto nobo. E proyekto nobo di Windsurfing Curaçao, ta enserá ku lo remplasá tur e kònteinernan den kua e neghoshi ta operá. Na lugá di e kònteinernan bieu, awor lo tin un lugá di almasenahe muchu mas efisiente di forma ku ta krea posibilidat pa por ofresé mas aktividat. Asina tambe ta garantisá e desaroyo di e negoshi.

Banda di e almasenahe pa e ekiponan, lo krea tambe un restorant chikí, un bar i mas espasio pa relahá, pues un kaminda ku bishitantenan por disfrutá di e akshon riba Spaanse Water. E konstrukshon nobo aki lo akapará un área di 240 meter kuadrá. E punto di salida di tantu e skol komo di e proyekto ta pa semper krea un ambiente inklusivo, den kua fanátikonan lokal di deporte di awa, huntu ku turistanan por disfrutá di e kondishonnan fantástiko ku Kòrsou ta brinda.

Lo ehekutá e proyekto aki den dos fase. E promé fase ta konstrukshon di e almasenahe. E di dos fase ta konstrukshon di e parti di ‘horeca’. Ta trata aki di un invershon di alrededor 500.000 florin ku fiansanan privá, di personanan ku tin apresio pa e kompania. A kuminsá ku e promé fase na sèptèmber i ta premirá ku ku lo finalisá tur konstrukshon den e promé lunanan di aña 2020.

Finalmente e proyekto di Windsurfing Curaçao lo generá mas o ménos 23 kupo di trabou. Ta trata aki di entre otro instruktornan di wensùrf i kaitsùrf, personanan ku ta hasi reparashon na ekipo i tablanan, personal di ‘horeca’, personal  di tienda, i personal di ofisina. Tin intenshon pa den futuro, uso e área di e shòp pa siña hóbennan kon pa hasi reparashon na e diferente tablanan di ‘fiberglass’ ku ta usa pa e diferente tipo di deporte di awa. Di e forma aki tambe por hasi posibel pa di un banda yuda hóbennan lora man i di otro banda kumpli ku e demanda haltu ku tin pa personanan ku por repará tablanan di ‘fiberglass’.

Duna bo komentario

Sign up for WhatsApp updates from Un Kòrsou Próspero