Kla pa Turismo

Gobièrnu di Kòrsou i Curacao Hospitality & Tourism Association (CHATA) a inisiá e proyekto Kla pa Turismo ku ta sali for di e nesesidat urgente pa trahadónan kapas den sektor hotelero i turÍstiko. Ku e proyekto aki lo prepará 300 persona pa subi merkado laboral den e sektor di turismo. Di e forma aki sektor privá i e yu di Kòrsou ku ke un trabou, lo saka benefisio. Naturalmente e benefisio di mas importante ta e aporte na desaroyo di e pilá di ekonomia: Turismo.

Miembronan di CHATA a indiká ku ta hopi difísil pa haña trahadónan kapasitá pa hotèl i restorant. E nesesidat aki lo sigui krese debí na e desaroyonan ku ta premirá pa e próksimo dos pa kuater aña. Lo bini 2500 kamber adishonal na Kòrsou, loke ta nifiká ku lo mester di alrededor di 4000 trahadó profeshonal pa hotèl i restorantnan. CHATA a mira esaki komo un demanda ku nos mester kuminsa traha riba dje for di aworaki.

Ministerio di Desaroyo Ekonómiko (MEO) a hasi un investigashon riba merkado laboral pa loke ta trata e sektor di turismo. Aki a identifiká un ‘gap’ entre e loke tin mester i loke merkado laboral ta ofresé. Personanan ku kaba estudionan den hospitalidat no semper ta ‘match’ ku e merkado laboral apesar ku nan a sigui e estudio. Di otro banda, Ministerio di Desaroyo Sosial, Labor i Bienestar (SOAW) tin un ‘werklozenbestand’ basta grandi. Aki a mira un bon oportunidat pa ekipá e grupo di personanan aki pa traha den sektor di turismo.

Durante e ehekushon di e proyekto Kla pa Turismo CHATA lo bai trein 300 persona dirihí, pa drenta den e sektor di hospitalidat. Lo enfoká riba kuater disiplina: asistente di servisio (‘bedieningsassistent’), asistente di kushina (‘keukenassistent’), kamarera (‘housekeeping’) i agente di seguridat (security). E partisipantenan lo haña un treinen di seis luna. Despues di terminá e trayekto ku éksito, e personanan lo haña dos sertifikashon: un sertifikashon di Stichting Vakbekwaamheid Horeca (SVH) di Hulanda i un sertifikashon di CHATA. E sertifikashon di SVH aki ta un oportunidat úniko pa e partisipante. E ta un sertifikado rekonosé internashonalmente. E ta fasilitá pa e persona por sea sigui krese den sektor hotelero. E sertifikashon di CHATA ta un prueba ku e persona tin e kapasidat i abilidat pa traha segun kualidatnan i regulashonnan stipulá pa e sektor di hospitalidat.

 

 

 

Duna bo komentario

Sign up for WhatsApp updates from Un Kòrsou Próspero