Curaçao Marriott Beach Resort

A bende Curaçao Marriot Beach Resort na Piscadera Bay na ougùstùs 2016 ku Piscamar Beach Resort, ku ta propiedat di famia Guis. Piscamar Beach Resort ta supervisá e ekspanshon i e renovashon kompleto di e hotèl. E hotèl lo ekspandé di 248 pa 328 kamber, 8 ‘suite’ i kuater piso ku un piso adishonal. A remodelá e edifisio kompleto i e áreanan rondó di dje, manera e interior, kabelnan di elektrisidat, sistemanan di disposishon di awa di riol, aire kondishoná i diseño di e hardin.

Tambe e Curaçao Marriot Beach Resort remodelá lo ofresé: un ‘ballroom’ adishonal di 557 meter kuadrá ku ta agregá 300 espasio èkstra na e ‘ballroom’ eksistente, un lòbi habrí i espasioso, e asina yamá ‘great room’ ku un bista espektakular di laman, un ‘executive VIP lounge’, un spa último modelo, un área di hasi ehersisio i kushinanan kompletamente nobo. Segun e plan Curaçao Marriot Beach Resort por yama bonbiní na su promé huespétnan den òktober 2019. E proyekto ta enserá un invershon total di 21.5 mion dòler di kapital di e propietario i un invershon di 34.5 mion dòler adishonal di un grupo di bankonan bou di guia di Maduro & Curiel’s Bank.

Curaçao Marriot Beach Resort ta komprometí pa duna un kontribushon na e komunidat lokal. A kontratá Impacto B.V. pa organisá un marshe di trabou riba dia 27 di yüli 2019 pa reklutá empleadonan pa alrededor di 400 vakatura. Tur empleado kontratá lo risibí un kurso interno (‘in-house training’) di e hotèl. Alabes, e ‘resort’ lo proveé un programa di lès kulinario grátis pa tres luna pa personanan ku tin un pashon pa kushinamentu (eksperensia previo no ta nesesario). Despues di kompletá e kurso, Curaçao Marriot Beach Resort lo ofresé e dies mihó graduadonan un trabou na e hotèl.

Duna bo komentario

Sign up for WhatsApp updates from Un Kòrsou Próspero