Corendon Mangrove Beach Resort Curaçao

Corendon Mangrove Beach Resort Curacao ta situá serka di laman i diagonal enfrente di e hospital nobo. E kompleho di sinku strea ‘all-inclusive’ lo tin e siguiente fasilidatnan: un restorant i terasa estilo bufèt ‘all-inclusive’, un hanchi di kuminda (‘food street’), un ‘swim up pool bar’, bar na playa, pasteleria, trùk di eiskrim, un bar na lòbi. Pa un gastu adishonal huéspetnan por disfrutá di un restorant di sushi, un bar di sigá, ròm i wiski, un ‘VIP beach outlet’ i un ‘microbrewery’. Huntu ku esaki, lo tin servisio di 24 ora na e ‘front office’, ‘guest relations’, hür di outo, ofisina di ‘tours & tickets’, salanan di reunion, servisio di labanderia, WIFI grátis i 6 pakus.

E ‘resort’ lo tin un parke di awa, un sala di wega i pelíkula, un klup pa mucha, kuido durante dia pa mucha, un anfiteater, un ‘tropical wellness garden’, espasio pa ‘fitness’, fasilidatnan di spa, un tienda di artíkulonan di sambuyá i deporte di awa. Tambe e lo brinda 275 espasio di parker. Corendon Mangrove Beach Resort Curacao ta kai bou di e kompania lokal Corendon Curacao Holding B.V., ku ta parti di Corendon Hotels & Resorts, ku ta pertensé na Corendon Group, ku su ofisina prinsipal establesí na Hulanda.

Lo realisá e proyekto aki den dos fase. Aktualmente ta konstruyendo fase unu riba e tereno kaminda Veneto Holiday Beach tabata situá i riba e tereno serka di esaki lo realisá fase dos den 2021. Fase unu ta konsistí di un kompleho di hotèl di 399 kamber dividí den 3 edifisio (1 edifisio nobo di 7 piso kaminda ántes Denny’s i e kasino tabata situá i e dos edifisionan di hotèl grandi eksistente pero kompletamente renová). BMW Curacao B.V. lo finalisá konstrukshon di e kompleho na desèmber 2019 i e ‘resort’ lo habri su portanan pa huéspet na komienso di 2020.

Pa realisashon di fase unu, aproksimadamente 250 empleado lokal ta envolví den tur faseta di e realisashon. Ademas tambe a envolví kasi eksklusivamente kompanianan lokal di suministro. Despues ku kompletá fase unu, un parti di e grupo lo kuminsá ku renovashon di Livingstone Jan Thiel Resort, kaminda lo konstruí 114 kamber di hotèl i lo modernisá i ekspandé fasilidatnan general. Corendon Mangrove Beach Resort Curacao ta konta riba un periodo di 6 luna pa finalisá trabounan di konstrukshon i asina kuminsá mesora ku fase dos di Corendon Mangrove Beach Resort Curacao. Den e di dos fase lo konstruí 450 kamber mas, un pisina adishonal, èkstra fasilidat di ‘catering’ ku ta inkluí un ‘beach club’ i tambe lo konstruí un playa nobo. E ‘all-inclusive resort’ kompleto ku 800+ kamber ta rekerí un invershon di aproksimadamente 100 mion dòler. Manera kalkulá, e tim kompleto lo traha pa tres i tres aña i mei riba kreashon di un kuart di e kambernan di hotèl na Kòrsou.

Pa loke ta trata empleo durante fase unu, Corendon Mangrove Beach Resort Curacao a kalkulá 400 kolega nobo ku lo keda reklutá pa tur faseta di trabounan di e hotèl, inkluyendo Maneho, Operashon, F&B, Benta i Mantenshon i pa empleadonan riba tur nivel. E kompleho grandi aki ku ta ekipá ku tur fasilidatnan moderno, ta rekerí despliegue di hopi diferente profeshonal, tantu den provishon di servisio na huéspetnan komo tras di kortina den sistema di IT, treinen i sosten general.

Corendon Mangrove Beach Resort Curacao kier kontribuí na profeshonalisashon i oportunidatnan pa karera pa hóbennan lokal. E meta ta pa permití profeshonalnan hóben pa haña eksperensia internashonal di trabou pa asina hasi grandi sektor di turismo na Kòrsou. Pa e motibu Corendon Academy lo kuminsá na final di 2019. E programa di stazjèr lo ta disponibel pa studiantenan di hospitalidat i turismo pero tambe pa empleadonan ambisioso pa futuro. Durante un periodo di masoménos 6 luna, lo prepará partisipantenan pa un karera na Corendon Hotels & Resorts pa medio di tayernan, treinen i stazje na Corendon su lokalidatnan den eksterior.

Pa mas informashon tokante Corendon Mangrove Beach Resort Curacao, tuma kontakto ku recruitment@corendonhotels.com pa asuntunan di rekurso humano i caroline.hartel@corendon.nl pa tur otro asuntu.

Duna bo komentario

Sign up for WhatsApp updates from Un Kòrsou Próspero