Parke di Palu di Mangel

Ehekushon di Programa di Desaroyo di Rif a kuminsá for di komienso di aña 2019. Meta di Programa Rif ta pa hasi di Rif un área vibrante pa habitantenan di Kòrsou i turista. E Programa di Desaroyo di Rif ta konsistí di 3 fase. Den e fase aktual – esta fase 1 – lo inisiá i finalisá 5 proyekto públiko grandi den e área aki, i tambe 3 proyekto di inisiativa privá. 

E proyektonan ku ta forma parti di e programa aki ta: un infrastruktura – adaptá na e nesesidat di futuro – pa maneho i transporte di awa di riolering, un kaya nobo pa konektá sentro di Otrobanda ku e terminalnan di krusero pa medio di ekstenshon di Hamelbergweg, Parke di Palu di Mangel 1, un kanal di konekshon entre Parke di Palu di Mangel 1 i 2 i un kaya nobo pa mehorá fluktuashon fásil i lihé di tráfiko ku ta bini di e terminalnan di krusero, via stadion di Rif. Gobièrnu mes lo finansiá e proyektonan aki, pa un montante total di entre 20 pa 25 mion florin. E proyektonan di inisiativa privá ta Hotèl Corendon i Hotèl Courtyard Marriott, i renobashon di Hotel Renaissance Curaçao Resort & Casino.

Desaroyo di e área di Rif tin su base den un kantidat di dokumento stratégiko durante añanan. Entre e dokumentonan aki ta figurá Plan Mayó (2007), Masterplan Rif di Konseho Insular, vishon stratégiko Zakitó, mas resien den Programa di Gobernashon 2017-2021 i por último Strategia di Kresementu pa Kòrsou.

Komo parti di e preparashon pa e konstrukshon di e Palu di Mangel, lo limpia e área di Palu di Mangel pa eliminá plaga di muskita i oló desagradabel. Den e segundo fase di e proyekto aki, lo pone instalashonnan pa asina konstruí rutanan den e parke kaminda por nabegá ku kanoa por i hende por kana. E Plan Mayó 2007 di konservashon di Palu di Mangel ta garantisá ku lo kita solamente un kantidat limitá di Palu di Mangel ku ta morto, kontaminá òf ku ta forma peliger.

 

Duna bo komentario

Sign up for WhatsApp updates from Un Kòrsou Próspero